अरुण तेस्रोमा आज पनि मजदुरकाे आन्दोलन जारी, काम अवरुद्ध
संखुवासभा जिल्लामा निर्माणधीन नौ सय मेगावाटको अरुण तेस्रो जलविद्युत आयोजनाका मजदुरहरू आन्दोलित हुँदा मंगलबार दोस्रो दिन पनि काम अवरुद्ध भएको छ ।
ज्याला बढाउनपर्ने माग राख्दै सोमबार बिहानैदेखि सुरु भएको आन्दोलन मंगलबार दोस्रो दिन पनि जारी रहेको जनाइएको छ ।
संखुवासभामा निर्माणधीन नौ सय मेगावाटको अरुण–३ जलविद्युत् आयोजनाको ड्यामसाइट रहेको मकालु गाउँपालिका–५ फ्याक्सिन्दा दोभानमा मजदुरहरूले काम अवरुद्ध पारेका हुन् ।
सोमबार बिहानैदेखि मजदुरहरू प्लेकार्डसहित नाराबाजी गर्दै अरुण–३ को निर्माणस्थल घेराउ गरेका हुन् ।
भौतिक पूर्वाधार कार्यालयले निर्धारण गरेको दररेटअनुसार मजदुरहरूले ज्याला पाउनुपर्ने माग राख्दै काम अवरुद्ध पारेका हुन् ।
कम्पनीले जिल्ला दररेटअनुसार, दक्ष मजदुरले ९ सय ४० रुपैयाँ, अर्धदक्षले ७ सय ७५ रुपैयाँ र ज्यामीले ६ सय ५० रुपैयाँलगायत थुप्रै मागहरू राख्दै आएका छन् ।
८ घन्टा ड्युटी भए पनि १२ घन्टासम्म दिन र रातमा काम गरिरहेको हुँदा ओभरटाइमको पैसा दिनुपर्ने, मजदुरहरूलाई हरेक महिनाको १५ तारिखभित्र तलबभत्ता बैंक खातामा जम्मा हुनुपर्ने, साप्ताहिक, पाक्षिक र मासिक रूपमा पाउने बिदा दिनुपर्ने, बिरामी बिदा दिनुपर्ने र विनाकारण मजदुरलाई कामबाट निकाल्ने कार्य बन्द गर्नुपर्नेलगायतका नाैबुँदे माग अगाडि सारेका हुन् ।
जिल्ला दररेटअनुसार तलबभत्ता नपाएको कारणले आन्दोलन गर्नुपरेको जेपी कम्पनीमा कार्यरत अपसर राईले बताए ।
जेपी कम्पनीमा कार्यरत घनश्याम कार्कीको नेतृत्वमा सात सदस्यीय वार्ता टोलीसमेत गठन गरेका छन् ।
यसअघि पनि मजदुरहरूले ज्याला बढाउन माग गर्दै काम अवरुद्ध गर्दा तत्कालै बढाउने सहमति भएको थियो । तर, नौ महिना बितिसक्दासमेत ज्याला बढाउने र स्थानीय मजदुरहरूलाई काम दिने सहमति निर्माण कम्पनीले पालना नगरेका भन्दै पुनः काम अवरुद्ध पार्न बाध्य भएको मजदुरहरूको भनाइ छ ।
सोमबार दुवै पक्ष छलफल भए पनि सहमतिमा पुग्न सकेन । आज (मंगलबार) मकालु गाउँपालिका अध्यक्ष तेजबहादुर पोख्रेल र स्थानीय प्रशासन र कम्पनीका प्रतिनिधिहरू बसेर छलफल गर्ने तयारी भएको जनाएको छ । सहमति कार्यान्वयन नभएसम्म काम सुचारु नहुनेसमेत कामदारहरूको भनाइ छ ।
उक्त अरुण तेस्रो सुरुङमार्ग निर्माणलगायतका ड्यामसाइटको काम भारतीय निर्माण कम्पनी जेपी एसोसियटर्स कन्ट्रक्सनले जिम्मा लिएर गरिरहेको छ ।
यस समुदाहिक चेतना मंच द्वारा संचालित नेपाल सेरोफेरोको राधाकृष्ण डुम्रे नेपाल सेरोफेरोका प्रधान सम्पादक हुनुन्छ उहा बिगत ३ दसकदेखि नेपाल पत्रकारिता क्षेत्रमा उल्लेखनिय योगदान गर्दै नेपाल पत्रकार महासंघ स्यांग्जाको जिम्मेवारी समेत निर्वाह गरिसक्नु भएको छ
